Presidenca e Kosovës nuk është pajtuar me reagimin e kryeministrit Edi Rama, ku ky i fundit tha se edhe Presidentja Vjosa Osmani kishte bërë kërkesë që KFOR të merrte kontrollin në veri. Sipas presidencës nuk bëhet fjalë për marrjen e kompetencave sovrane të institucioneve të sigurisë së Kosovës nga KFOR-i, por për mbështetjen e institucioneve të Kosovës në ndalimin e agresionit nga Serbia. Në reagim Presidenca e Kosovës shkruan se Presidentja Osmani edhe në takime me partnerët dhe aleatët e ka sqaruar se mandati i KFOR-it, është vetëm si reagues i tretë dhe në mbështetje të Policisë së Kosovës për sundimin e ligjit dhe sigurinë në secilën pjesë të territorit të saj. “Institucionet e Kosovës kanë kërkuar mbështetje nga NATO-ja, që patrullimet në zonën kufitare t’i përfshijnë edhe ushtarët e NATO-s, përkrah policëve të Kosovës në mënyrë që të parandalohet hyrja e grupeve terroriste dhe sulmet nga Serbia”, thuhet më tej në deklaratë.