Katër të rinj me kombësi serbe janë ndaluar nga policia e Kosovës të martën (10.09.2024), dhe u është caktuar masa e paraburgimit. Të rinjtë u ndaluan për akuzën ‘sulm ndaj zyrtarit’, pasi sipas policisë së Kosovës, kanë fyer dhe sulmuar zyrtarë policorë dhe më pas janë larguar prej vendit të ngjarjes. Njëri prej zyrtarëve është plagosur, ndërsa nga autoritetet bëhet me dije se tre nga të rinjtë e ndaluar kanë rezultuar nën ndikimin e alkoolit. Lista Serbe, partia më e madhe e serbëve në Kosovë, ka akuzuar Policinë e Kosovës pas ndalimit të katër të rinjve, se janë brutalë ndaj serbëve, dhe se brutaliteti është kthyer në një dukuri të përditshme në veri të Kosovës. Në reagimin e Zyrës për Kosovën në Qeverinë e Serbisë është thënë se “ndalimi brutal dhe rrahja e të rinjve serbë” nga Policia e Kosovës, “pasqyron politikat antiserbe dhe represionin e torturën që vuajnë dhe përjetojnë serbët nga veriu i Kosovës çdo ditë". Sipas saj, ekzistojnë pamje ku shihet se "policët i hedhin në tokë dhe për 10 minuta i rrahin dhe i tërheqin të rinjtë serbë".