Beteja politike që mbajti peng për dy vite hapjen e negociatave me Shqipërinë, ka marrë fund vetëm pasi Maqedonia e Veriut u dorëzua dhe pranoi propozimin e Francës. Dy ditë pasi nënshkroi protokollin e mirëkuptimit me Bullgarinë, e cila nga ana e saj, hoqi veton veton kundër anëtarësimit të Shkupit, kabineti qeveritar i udhëhequr nga kryeministri Dimitar Kovaçevski do të udhëtojë të martën drejt Brukselit. Pas një rruge të gjatë për të dyja vendet, Shqipëria dhe Maqedonia e Veriut do të mbajnë konferencën e parë ndërqeveritare politike duke hapur rrugën kështu për nisjen e kapitujve të anëtarësimit. Pas betejës politike në Shkup, kryeministri Kovaçevski do të lexojë deklaratën hapëse të negociatave. Më pas, Këshilli Evropian do të formalizojë kushtet për konferencën e dytë ndërqeveritare e cila pason pas ndryshimeve kushtetuese në Shkup.