Në kuadër të planit operacional kombëtar të koduar “Territor i pastër”, policia e Kurbinit ka zbuluar dhe më pas asgjësuar qindra bimë narkotike kanabis sativa. Një person ka rënë në prangat e policisë, pasi dyshohet si autori i dyshuar i kultivimit të bimëve narkotike. Autori i ëndës narkotike dyshohet se ka kultivuar në një sipërfaqe toke në pronësi të tij, të mbjellë me misër, 900 bimë të dyshuara narkotike cannabis sativa, të cilat u asgjësuan me anë të djegies. Gjithashtu, ky shtetas kishte krijuar lidhje të paligjshme të energjisë elektrike për të furnizuar sistemin e vaditjes së këtyre bimëve. Ky person po hetohet për veprat penale “Kultivimi i bimëve narkotike” dhe “Vjedhja e energjisë elektrike”. Ndërkohë një shtetas tjetër ka rënë në prangat e policisë së Gjirokastrës, pasi dyshohet se ka kultivuar në oborrin e banesës së tij, bimë narkotike cannabis sativa. Ky shtetas rezulton me precedent të mëparshëm penal për kultivim të bimëve narkotike. Pas kontrolleve në banesën e tij policia i gjeti dhe i sekuestroi rreth 600 gramë kanabis sativa.