Mjekët e spitalit Onkologjik të dyshuar për korrupsion e kontrabandë me medikamentet mjekësore do të dalin të mërkurën para Gjykatës së Posaçme për t’u njohur me masat e sigurisë. SPAK ka kërkuar informacion nga bankat dhe hipotekat për pasuritë dhe astetet e mjekëve në kuadër të hetimit pasuror. Prokuroria e Posaçme ka urdhëruar që të hetohen edhe disa farmaci që dyshohet se kanë kryer kontrabandë ilaçesh. Megjithatë deri më tani nuk dihet se për cilat farmaci bëhet fjalë. Disa prej tyre kanë dalë edhe në hetimin e Prokurorisë së Tiranës, por ndaj tyre nuk është ngritur asnjë akuzë dhe nuk është vendosur asnjë masë. GJKKO do të vendosë të mërkurën masat e reja të sigurisë, ku nuk përjashtohet që SPAK të ashpërsojë këto masa për disa prej të akuzuarve. SPAK ka ngritur akuzat për kontrabandë ilaçesh, shpërdorim detyre dhe korrupsion për shtatë personat nën hetim për skandalin në spitalin Onkologjik. Ky skandal doli në dritë nga një hetim i bërë nga Prokuroria e Tiranës, e cila zbuloi skemën ku përfshihen mjekë të shërbimit onkologjik dhe stafi i këtij shërbimi, të cilët transferonin pacientë nga shërbimi onkologjik drejt klinikave private, kryesisht tek klinika private e kirurgut Edmond Gashi, me qëllim përfitimi. Personat nën hetim janë Edmond Gashi, Emiljano Leka, Alketa Ymeri Pere, Brikena Qirjazi, Halil Gashi, Drilona Kishta dhe Florian Marku.