Agjencia e Mbikëqyrjes Policore për rajonin Fier- Berat ka pezulluar nga detyra oficerin e policisë, inspektor E.P., me detyrë Trup Shërbimi i Trafikut Interurban dhe Urban në DVP Fier. Masën e sigurimit personal “Pezullimi i ushtrimit të një detyre a shërbimi publik” ndaj oficerit të policisë e ka marrë më parë Gjykata e Shkallës së Parë e Juridiksionit të Përgjithshëm Fier. Ky procedim është ndjekur në bashkëpunim me Prokurorinë pranë Gjykatës së Shkallës së Parë, pas dyshimeve se oficeri i policisë, Inspektor E.P. ka kryer veprime korruptive me drejtues automjetesh, duke mos i ndëshkuar me masë administrative. Mbi inspektorin rëndojnë veprat penale “Shpërdorimi i detyrës” dhe “Korrupsion pasiv i personave që ushtrojnë funksione publike”. Agjencia e Mbikëqyrjes Policore mbetet e përkushtuar në misionin e saj për garantimin e zbatimit të ligjit dhe fton qytetarët të denoncojnë të gjitha rastet e abuzimit apo shkeljes së ligjit nga ana e punonjësve të Policisë së Shtetit, Gardës së Republikës apo Shërbimit Zjarrfikës.