Në rubrikën Shënimet e Javës, me të cilën Kryeministri Edi Rama nis podkastin Flasim çdo të diel, kreu i qeverisë foli edhe për drejtësinë dhe nevojën për të rishikuar politikat penale në vend, që sipas tij, nuk janë ende në cilësinë dhe standardet europiane. Sinkron rama - Siç e kam thënë na duhet një reflektim i madh, serioz dhe largpamës mbi politikën penale në Shqipëri, sepse duhet të adresojmë problematika të mprehta, por njëkohësisht të mbrojmë pavarësinë, të nxisim paanësinë dhe të rrisim cilësinë e drejtësisë në këtë vend, ku kemi më në fund një drejtësi të pavarur, falë lidershipit të Partisë Socialiste të Shqipërisë dhe mbështetjes bipartizane të popullit shqiptar, po nuk kemi ende as një drejtësi të paanshme e as një drejtësi cilësore. Nuk është e lehtë, por unë nuk i jam përkushtuar politikës për të bërë gjëra të lehta apo për t’i marrë lehtë gjërat e rënda. Përkundrazi. Rama tha se kjo ka qenë edhe temë diskutimi me ministrin e Drejtësisë në Francë, ku nuk ka përjashtuar mundësinë që ekspertët francezë të ndihmojnë në këtë drejtim.