Kamala Harris tha se nuk ka mbaruar ende punë me politikën dhe sugjeroi fuqimisht se po shqyrtonte mundësinë e një kandidature tjetër për presidente. Në një intervistë për BBC, Harris tha se “ndoshta” do të ishte presidentja e ardhshme, duke bërë sugjerimin më të qartë deri më sot se do të bënte një tjetër përpjekje për Shtëpinë e Bardhë në vitin 2028, pavarësisht se mbetet shumë prapa në sondazhe. Harris këmbënguli se ende nuk kishte marrë një vendim, por se ishte e bindur se përfundimisht do të kishte një grua presidente në Shtëpinë e Bardhë dhe karriera e saj politike nuk kishte mbaruar ende. “Nuk kam mbaruar”, i tha ish-zëvendëspresidentja BBC-së. “E kam jetuar të gjithë karrierën time si një jetë në shërbim të amerikanëve dhe kjo është në ADN-në time”. Harris hodhi poshtë sondazhet që e nxjerrin atë në një pozicion jo të favorshëm për të fituar edhe një herë mandatin e demokratëve pasi aktualisht ajo renditet edhe pas aktorit të Hollivudit Dëayne "The Rock" Johnson. "Nëse do t'i dëgjoja sondazhet, nuk do të kisha kandiduar për postin tim të parë, ose për postin tim të dytë dhe sigurisht që nuk do të isha ulur këtu," tha ajo. Harris tha më tej në intervistë se paralajmërimet që bëri gjatë fushatës në lidhje me sjelljen e Donald Trump si fashist dhe autoritar kishin rezultuar të sakta. Ajo e kritikoi ashpër ish-rivalin e saj duke e quajtur një "tiran" që po e përdor sistemin e drejtësisë si armë. Në një përgjigje për BBC-në, një zëdhënës i Shtëpisë së Bardhë tha: “Kur Kamala Harris humbi zgjedhjet me një diferencë të thellë, ajo duhet ta kishte kuptuar aludimin; populli amerikan nuk interesohet për gënjeshtrat e saj absurde”.