Pavarësisht përpjekjeve të faktorit ndërkombëtar, situata në veriun e Kosovës vijon të mbetet e tensionuar, teksa zhvillimet e kësaj të premteje ‘i kanë fryrë edhe më shumë zjarrit”. Arrestimi i një serbi në Mitrovicën e Veriut, marshimi i Forcave të Sigurisë së Kosovës në Mitrovicën e Jugut dhe retorika e rëndë e Serbisë, kanë shqetësuar jo pak kreun e diplomacisë europiane, Joseph Borrell, që ka reaguar shpër në një postim në Twitter. “Shumë i alarmuar nga situata në veri të Kosovës: arrestime të jashtëligjshme të serbëve të Kosovës dhe Forcat e Sigurisë së Kosovës që marshojnë në Mitrovicën e Jugut; e ndjekur nga retorika e rëndë nga Serbia. Pavarësisht takimit të djeshëm, përshkallëzimi vazhdon dhe po bëhet i rrezikshëm. Nuk do ta tolerojmë”, shkroi Borrell. Paraditen e të premtes Policia e Kosovës arrestoi një tjetër person të dyshuar për sulm ndaj KFOR-it në veri, serbin Nenad Orlovic, i njohur me nofkën “rusi” për shkak të lidhjeve të forta me Rusinë. Ndërkohë në pjesën jugore të Mitrovicës, Ushtarët e Forcës së Sigurisë së Kosovës kanë marshuar në një stërvitje të zakonshme, për të cilën kishin vënë në dijeni edhe KFOR-in. Ky veprim nxiti një reagim të ashpër të Serbisë, që nëpërmjet kreu të forcave të armatosura deklaroi se është gati të ndërhyjë për mbrojtjen e serbëve në veri të Kosovës.