Banka e Shqipërisë vendosi të mbajë të pandryshuar normën bazë të interesit në nivelin 3 për qind. Pas mbledhjes së Këshillit Mbikëqyrës, guverantori Gent Sejko u shpreh se kursi i këmbimit po vjen drejt stabilizimit megjithatë operatorët e tregut valutor duhet të mbeten vigjilentë. Sejko: “Pas një forcimi të shpejtë në periudhën maj – korrik, kursi i këmbimit të lekut është stabilizuar në periudhën gusht-shtator, duke gjetur një ekuilibër të ri rreth niveleve aktuale. Kjo ecuri sugjeron se ndërsa përmirësimi i bilanceve të huaja të ekonomisë shqiptare dikton një sjellje të kahut forcues të lekut në periudha afatmesme e afatgjata, tregu valutor ka qenë dhe do të mbetet subjekt i luhatjeve afatshkurtra. Për këtë arsye, të gjithë operatorët e tregut valutor duhet të jenë të kujdesshëm në aktivitetin e tyre, duke shmangur marrjen e ekspozimeve të panevojshme ndaj rrezikut të kursit të këmbimit.” Guvenatori Sejko vlerëson se inflacioni pritet të kthehet në objektivin e Bankës së Shqipërisë në mesin e vitit 2024.