Kolonel-gjenerali Oleksandr Syrskyi, që ka udhëhequr forcat tokësore ukrainase që nga 2019-a, është bërë tani komandant i forcave të armatosura të ukrainës ndërsa lufta me rusinë po i afrohet vitit të saj të tretë. Ai zëvendëson kështu në detyrë komandantin shumë popullor në Ukrainë, Valeri Zaluzhni. Sidoqoftë, edhe Syrskyi ka qenë një figurë e rëndësishme gjatë pushtimit rus të Ukrainës. Ai ka lindur në korrik 1965 në rajonin Vladimir të Rusisë, që në atë kohë ishte pjesë e bashkimit Sovjetik. Ka jetuar në ukrainë, që nga vitet 1980. Si shumë persona të tjerë të moshës së tij në forcat e armatosura të ukrainës, ai ka studiuar në Moskë, në shkollën e komandës së lartë ushtarake, mes atyre që janë bërë që nga ajo kohë komandantë rusë. U diplomua në 1986 dhe shërbeu për pesë vite në trupat sovjetike të artilerisë. Disa analistë ushtarakë, besojnë se taktikat e tij në fushëbetejë, reflektojnë trajnimin e tij hierarkik sovjetik. Syrskyi u bë shef i forcave tokësore të ukrainës në 2019-ën. Ai më herët ka komanduar trupat ukrainase që luftonin një rebelim të mbështetur nga moska në rajonet lindore të donetskut dhe luhanskut, që nisi në 2014-ën, dhe mori nofkën Leopardi i borës. Disa prej fitoreve më të mëdha të ukrainës gjatë pushtimit rus, janë arritur nga Syrskyi. Ai udhëhoqi me sukses mbrojtjen e kryeqytetit Kiev në muajt e parë të pushtimit dhe u nderua me titullin Hero i Ukrainës, nderimi më i lartë në vend në prill 2022. Në korrik 2022, Syrskyi planifikoi dhe ekzekutoi një kundërofensivë të shpejtë që i shtyu pas trupat ruse nga qyteti i Harkivit dhe riktheu nën kontrollin e kievit pjesë të mëdha toke në lindje dhe juglindje. Vitin e kaluar, ai udhëhoqi mbrojtjen ukrainase të qytetit lindor të Bakhmutit, ku mijëra ushtarë nga të dyja palët u vranë në një nga betejat më të përgjakshme të luftës, deri më tani. Disa analistë ushtarakë e vinin në diskutim nëse lufta për një qytet të rrënuare kishte aq shumë vlerë. Por Syrskyi tha se mbrojtja ukrainase e Bakhmutit kishte penguar përpjekjet më të gjera të luftës të rusisë duke mbajtur të mbërthyer atje grupin mercenar Vagner. Syrskyi thotë se prioriteti i tij është morali i trupave, të cilat ai rregullisht i viziton në front. AI i ka thënë mediave perëndimore se fle vetëm katër orë e gjysmë në natë dhe relaksohet duke bërë palestër. Syrskyi është i martuar dhe ka dy djem.