Avokatët mbrojtës të Erion Veliajt e konsiderojnë të paprovuar dhe të pabazuar dosjen për kryebashkiakun, të cilën pas përfundimit të hetimeve, SPAK e dërgoi për gjykim. Në deklaratë përfaqësuesit ligjorë listojnë disa pretendime për shkelje gjatë procesit të ndjekur ndaj Veliajt. “Ky është një proces që: ka nisur mbi një kallëzim anonim dhe të falsifikuar; është zhvilluar për një periudhë prej të paktën 7 muaj, pa asnjë autorizim të vlefshëm ligjor; është mbështetur në hapje të korespondecave private pa autorizim të gjykatës dhe parashikim të ligjit; ka përfshirë deklarime vetëinkriminuese të marra nën presion; është drejtuar nga një individ që nuk ka qenë asnjëherë prokuror ligjërisht i Republikës; ka shkelur në mënyrë flagrante afatet hetimore të përcaktuara nga ligji; ka mohuar brutalisht të drejtën e mbrojtjes dhe kundërshtimeve ndaj hetimit.” – thuhet në deklaratën e avokatëve të kryebashkiakut Erion Veliaj.