Rusia thuhet se po mbledh një batalion me koreanoveriorë për të ndihmuar në zbrapsjen e forcave të Ukrainës nga Kursku. Siç raportohet nga disa media ukrainase që citojnë një burim në inteligjencën ushtarake ukrainase, Moska do të plotësojë radhët e saj me trupa të dërguara nga Kim Jong Un. Trupat mund të përfshihen më pas në misione luftarake në rajonet jugperëndimore të vendit, thanë burimet. Përveç humbjes së niveleve të konsiderueshme të pajisjeve ushtarake në Ukrainë, cdo ditë, Rusia aktualisht po përballet edhe me një mungesë të madhe të trupave në luftë dhe i është drejtuar si rekrutimeve të detyruara, ashtu edhe pagesave për trupat që regjistrohen. Në një përpjekje të dukshme për të plotësuar nevojat e saj, ushtarët e Koresë së Veriut do të formojnë një "batalion special Buryat", të quajtur sipas grupit etnik mongol, autokton, në rajonin që përfshin Siberinë, si dhe Mongolinë veriore dhe Kinën. Batalioni parashikohet të ketë deri në 3,000 ushtarë të Koresë së Veriut dhe aktualisht është duke u pajisur me armë dhe municione. E gjithë kjo përforcon deklaratat e bëra nga zëdhënësi i Pentagonit, Patrik Ryder, në qershor, që tha se koreanoveriorët së shpejti mund ti bashkoheshin forcave ruse në vijën e frontit. Ai paralajmëroi se nëse kjo do të ndodhte, ata do të bëheshin mish për top në luftën në Ukrainë. Edhe presidenti ukrainas, volodimir Zelenski, tha të hënën se rusia kishte kaluar në një përfshirje më të drejtpërdrejtë të forcave koreanoveriore në luftë. “Ne shohim një aleancë në rritje midis Rusisë dhe regjimeve si Koreja e Veriut”, tha Zelenski. "Kjo nuk ka të bëjë më vetëm me transferimin e armëve por edhe me dërgimin e njerëzve nga Koreja e Veriut te forcat ushtarake pushtuese". Më 3 tetor, mediat ukrainase dhe ruse raportuan se gjashtë ushtarë të Koresë së Veriut ishin vrarë në vijën e frontit pranë Donetskut, me zyrtarët e Koresë së Jugut që pretendonin se transferimet e mëtejshme të trupave do të ishin "shumë të mundshme duke pasur parasysh marrëdhëniet ushtarake në zhvillim mes dy vendeve.