Sa më shumë afron koha e mbajtjes së zgjedhjeve parlamentare 2025, aq më shumë shtohen përpjekjet e partive politike për të krijuar koalicione, për të arritur rezultat më të mirë në zgjedhje. Ish-kryedemokrati Lulzim Basha, tashmë numri një i grupimit të njohur si ‘Demokratët Euroatlantikë’, është shprehur në medie se është në fazë të avancuar diskutimi me Endri Shabanin e Nismës thurje për një bashkëpunim elektoral në këto zgjedhje. Por ky pohim është përgënjeshtruar menjëherë nga vetë Endrit Shabani, i cili nëpërmjet një postimi në rrjetet sociale mohon një gjë të tillë, duke siguruar se Nisma Thurje dhe ai ka ‘0’ shance të bashkëpunojë me Lulzim Bashën. “Ka ‘ZERO’ shance që unë apo Nisma Thurje të jemi bashkë me Lulzim Bashën në zgjedhjet e 2025-ës. Pikë!”, shkruan Endrit Shabani, duke përgënjeshtruar Lulzim Bashën. Nga ana tjetër, kohë më parë, burime për Top News pranë Lëvizjes ‘Shqipëria Bëhet’, thanë se edhe pse ishte diskutuar për një bashkëpunim me Bashën, ka qenë kryesia e kësaj force politike që në mbledhjen e saj me shumicë votash kanë rrëzuar një mundësi të tillë. Tashmë mbetet për tu parë se çfarë alternative do të zgjedhë Lulzim Basha për të hyrë në zgjedhje dhe me cilat parti do të ketë koalicion.