Panorama e zezë kriminale që ka përfshirë Shqipërinë në harkun kohor të pak muajve, ka kthyer sytë nga strukturat e policisë vendore. Kreu i Policisë Kriminale Tonin Vocaj së bashku me drejtorin e përgjithshëm të policisë, Ardi Veliu kanë zhvilluar një mbledhje urgjente me zëvendësdrejtorët e qarqeve. Në rend të ditës së mbledhjes që zgjati më shumë se tre orë, ishin disa çështje me rëndësi për rendin dhe sigurinë në vend të tilla si: intensifikimi i kontrolleve të lokaleve që frekuentohen nga personat me precedent kriminal, informacionet dhe arrestimet e bëra për personat që lëvizin me armë pa leje, situatën e kanabisit në vend, operacionet dhe gjetjet e deritanishme, progresin e hetimeve për zbardhjen e ngjarjeve kriminale si dhe operacionet për evidentimin dhe reagimin ndaj ndërtimeve pa leje. Kjo mbledhje e kreut të policisë kriminale me zëvendës drejtorat e qarqeve vjen vetëm pak kohë pas takimit të Ardi Veliut me drejtuesit e qarqeve. Stukturat policore në nivel qarku e sidomos niveli drejtues i tyre, i pret një furtunë ndryshimesh në muajt në vijim. Vetëm pak ditë më parë në konferencën për mediat, ministri i brendshëm Çuçi, paralajmëroi ndryshime të qënësishme në postet e larta drejtuese të Policisë së shtetit, pa zbuluar ende asnjë emër konkret.