Pas dështimit të seancës së 12-të radhazi për konstituimin e Kuvendit të Kosovës, Ambasada e Shteteve të Bashkuara të Amerikës në Prishtinë ka përsëritur qëndrimin e saj zyrtar, duke theksuar se përgjegjësia për zgjidhjen e ngërçit institucional bie mbi udhëheqësit politikë të vendit. Sipas zëdhënësit të Ambasadës, u takon qytetarëve të Kosovës të vendosin se kush duhet t’i përfaqësojë ata. Sipas tij, Kosova është një vend sovran, demokratik dhe i pavarur. Konstituimi i Kuvendit, i nisur më 15 prill, po dështon për shkak se Lëvizja Vetëvendosje nuk ka arritur të sigurojë votat e nevojshme prej 61 për kandidaten e saj për kryetare, Albulena Haxhiu. Partitë që po kundërshtojnë emrin e Haxhiut për kryeparlamentare i kanë kërkuar LVV-së të ndryshojë propozimin për postin, në mënyrë që procesi të zhbllokohet.