Shtetet e Bashkuara të premten bënë thirrje për një marrëveshje të re për kontrollin e armëve pasi traktati që vendoste kufizime për vendosjen e armëve strategjike bërthamore mes Rusisë dhe SHBA-së skadoi të enjten. Rusia kishte sugjeruar që të dyja palët të zgjasnin vullnetarisht kushtet e marrëveshjes edhe për një vit për të siguruar kohë për të diskutuar një traktat pasardhës, por Presidenti amerikan Donald Trump tha në një postim në mediat sociale të enjten se duhet të ketë një traktat të ri. Nënsekretari amerikan i Shtetit për Kontrollin e Armëve dhe Sigurinë Ndërkombëtare Thomas DiNanno tha në një Konferencë për Çarmatimin në Gjenevë se zgjatja e NEË START, që vendoste kufizime për dy fuqitë më të mëdha bërthamore, nuk do t'i sillte dobi SHBA-së ose botës, pasi ishte e gabuar dhe nuk përfshinte Kinën. "Sot, Shtetet e Bashkuara përballen me kërcënime nga fuqi të shumta bërthamore. Shkurt, një traktat dypalësh me vetëm një fuqi bërthamore është thjesht i papërshtatshëm në vitin 2026 dhe në të ardhmen", tha DiNanno. Më herët ai u tha gazetarëve se Trump kishte qenë i qartë se dëshiron një traktat të ri mbi kontrollin e armëve bërthamore. Trump, i cili foli me Presidentin Kinez Xi Jinping të mërkurën, dëshiron që Kina të përfshihet në një marrëveshje për reduktimin e armëve bërthamore. Ambasadori i Kinës për çarmatimin, Shen Jian, tha të premten se vendi i tij nuk do të marrë pjesë në negociata të reja me Moskën dhe Uashingtonin. Më parë, Pekini ka theksuar se ka shumë më pak koka bërthamore, rreth 600, krahasuar me rreth 4,000 që ka SHBA dhe Rusia. DiNanno tha se SHBA-të ishin në dijeni se Kina kishte kryer teste shpërthyese bërthamore, të cilat ishte përpjekur t'i fshihte.