Kryeministri izraelit Benjamin Netanyahu do të takohet me Presidentin amerikan Donald Trump në Uashington të mërkurën për të diskutuar mbi Iranin dhe programin e tij bërthamor, tha zyra e tij. Netanyahu "beson se të gjitha negociatat duhet të përfshijnë kufizimin e raketave balistike dhe ndërprerjen e mbështetjes për boshtin iranian", tha zyra e Netanyahut në një deklaratë të shkurtër, duke iu referuar mbështetjes së Teheranit për grupet militante në rajon. SHBA-të dhe Republika Islamike e Iranit zhvilluan bisedime indirekte të premten në Oman, të cilat duket se u kthyen në pikën fillestare se si t'i qasen diskutimeve mbi programin bërthamor të Teheranit. Trump i quajti bisedimet "shumë të mira" dhe tha se të tjera ishin planifikuar për në fillim të javës së ardhshme. Uashingtoni u përfaqësua nga i dërguari special për Lindjen e Mesme, Steve Ëitkoff, dhe Jared Kushner, dhëndri i Trumpit. Trump ka kërcënuar vazhdimisht të përdorë forcën për të detyruar Iranin të arrijë një marrëveshje mbi programin e tij bërthamor, pasi dërgoi aeroplanmbajtësen USS Abraham Lincoln dhe anije të tjera luftarake në rajon mes shtypjes së protestave mbarëkombëtare nga Teherani që vranë mijëra njerëz. Të dielën, Ministri i Jashtëm iranian Abbas Araghchi tha se "grumbullimi ushtarak i SHBA-së në rajon nuk na tremb", ndërsa fliste në një samit në Teheran. Ai këmbënguli se forca e Teheranit vinte nga aftësia e vendit për t'u "thënë jo fuqive të mëdha", duke shtuar se "sekreti i fuqisë së Republikës Islamike të Iranit qëndron në aftësinë e saj për t'i bërë ballë ngacmimit, dominimit dhe presioneve nga të tjerët". "Ata kanë frikë nga bomba jonë atomike, ndërsa ne nuk po kërkojmë një bombë atomike. Bomba jonë atomike është fuqia për t'u thënë jo fuqive të mëdha. Sekreti i fuqisë së Republikës Islamike qëndron në fuqinë për t'u thënë jo fuqive".