Kryedemokrati Lulzim Basha, ka nënshkruar marrëveshje me Këshillin e Agrobiznesit Shqiptar. Basha e cilësoi bujqësinë si sektorin më jetik për ekonominë e vendit si dhe theksoi se Partia Demokratike ka hartuar programe serioze për mbështetjen e fermerëve dhe agrobiznesin shqiptar. Lulzim Basha premtoi 100 milion euro subvencione për fermerët si dhe nxitjen përmes shumëfishimit të ndihmës nga program IPARD. Ne e dimë fare mirë që nga njëra anë procesi i anëtarësimit në Bashkimin Europian do t’i mundësojë këtij sektori, sektorit të bujqësisë, të ushqimit, të konsumit, një mbështetje që i ka munguar deri më sot apo që është keqpërdorur: IPARD-i ka mundësinë të shumëfishohet përmes programeve të tjerat të shumta të Bashkimit Europian për të ndihmuar fermerët, agrobiznesin, turizmin dhe të gjithë degët e tjera të ekonomisë të lidhura me të. Kryetari I Partisë Demokratike u bëri apel fermerëve të votojnë masivisht në 25 Prill për të bërë konkretizimin e marrëveshjes tashmë të nënshkruar.