Në vigjilie të festës së Pashkës, kryebashkiaku i Tiranës Erion Veliaj së bashku me pastorin Ergest Biti vizituan kishën e re Protestante në Kombinat. Veliaj shprehu mirënjohjen për punën e bërë në kishë dhe tha se është i kënaqur që besimtarët Protestantë kanë një hapësirë dinjitoze për t’u mbledhur dhe shërbyer komunitetit. “Jam shumë mirënjohës për punën e mrekullueshme; ndërtesa ndihmon, është një hapësirë ku mblidhemi dhe organizohemi, ku ushqejmë fëmijët dhe adhurojmë Perëndinë, por fakti se puna ka vijuar edhe gjatë kohës kur nuk ka pasur ndërtesa, do të thotë se misioni është më i madh se sa llaçi, tullat dhe tjegullat. Tani që kemi ndërtesën, sigurisht bëhet pak më e lehtë të shërbesh në një komunitet të jashtëzakonshëm, sidomos këtu në mes Kombinatit dhe Vaqarrit. Pas disa vitesh, këtu do të jetë krijuar një lagje e tërë.”