Më shumë se 1,000 pallate banimi në kryeqytetin ukrainas Kiev janë ende pa ngrohje pas një sulmi shkatërrues rus në fillim të kësaj jave, thanë autoritetet lokale të dielën. Rusia ka intensifikuar sulmet mbi sistemin energjetik të Ukrainës që kur pushtoi fqinjin e saj në vitin 2022. Presidenti Volodymyr Zelenski tha se Rusia kishte lëshuar 1,100 dronë, më shumë se 890 bomba ajrore dhe mbi 50 raketa, duke përfshirë armë balistike, lundruese dhe me rreze të mesme veprimi, kundër Ukrainës gjatë javës së kaluar. Të premten, një sulm me raketa në Kiev la praktikisht të gjithë qytetin pa energji dhe ngrohje mes një valë të ftohti therës, dhe vetëm të dielën autoritetet rikthyen furnizimin me ujë dhe pjesërisht edhe energjinë elektrike dhe ngrohjen. Zelenski tha se Rusia priti qëllimisht acarin për të përkeqësuar gjërat për popullin ukrainas, dhe ky ishte "një terror cinik rus kundër civilëve". Dimri i katërt i luftës mund të jetë më i ftohti dhe më i vështiri deri më tani, me dëmet e akumuluara në rrjet që i çojnë shërbimet në prag të humnerës ndërkohë që temperaturat tashmë kanë rënë nën -12 gradë celcius dhe pritet të bien akoma më shumë në vijim. "Puna është duke vazhduar. Megjithatë, situata e furnizimit me energji në kryeqytet mbetet shumë e vështirë", tha kryebashkiaku i Kievit Vitalii Klitschko në Telegram. "Sipas parashikimeve, ngricat e forta nuk pritet të qetësohen në ditët në vijim. Prandaj, situata e vështirë në kryeqytet do të vazhdojë", shtoi ai. Ndërkohë, Ministria e energjisë e Ukrainës tha se forcat ruse kishin sulmuar përsëri sistemin energjetik të vendit gjatë natës, duke ndërprerë përkohësisht energjinë elektrike në rajonet juglindore të Dnipropetrovsk dhe Zaporizhzhia. Ukrainasit po strehohen ndërkaq në tenda emergjence, me ngrohje, në Kiev. Autoritetet thonë se rreth 400 njerëz në ditë po përdorin qendrat provizore për t'u ngrohur, për të karikuar pajisjet dhe për të marrë ushqim.