Arka e shtetit gjendet në një panoramë ekonomike të dëmtuar, me borxh të lartë publik, ekonomi informale dhe protesta masive të qytetarëve që nuk përballojnë dot kostot e jetesës. Pikërisht në këtë moment, qeveria risolli në fokus nismën ligjore që është mbajtur prej vitesh pezull: amnistinë fiskale. Legalizimi i parave të padeklaruara të emigrantëve, duke lënë jashtë skemës zyrtarët e lartë të shtetit, u bë pjesë e pyetësorit të këshillimit kombëtar, ku 332 mijë qytetarë u shprehën pro amnistisë fiskale për emigrantët. Por, a shton amnistia fiskale rrezikun e pastrimit të parave të krimit në Shqipëri? Task Forca kundër krimit Financiar të Shteteve të Bashkuara të Amerikës, në mbledhjen e një muaji më parë e përfshiu Shqipërinë në listën e zezë të pastimit të parave të krimit të organizuar dhe investimit të tyre në prona të paluajtshme në Shqipëri.