Lirohen nga detyra katër nënkryetarët e bashkisë së Tiranës, pak ditë pasi në një takim me dyer të mbyllura, kryeministri Edi Rama kërkoi ristrukturimin e kësaj bashkie. Mësohet se në një mbledhje të kryesuar nga Ogerta Manastirliu, punonjësit e bashkisë janë njoftuar për lirimin nga detyra të nënkryetarëve Frida Pashako, Andi Seferi, Keti Luarasi dhe Jonida Halili. Ndërkohë që janë caktuar edhe nënkryetarët e rinj të bashkisë. Burime bëjnë me dije se Ilir Mëngra do të jetë përgjegjës për punët publike. Në Janar të vitit 2024, Ilir Mëngra u emërua drejtor i DPSHTRR-së, institucion në varësi të Ministrisë së Energjisë Vasilika Vjero, e cila më herët ka mbajtur postin e zëvendësministres së financave, do të shërbejë si nënkryetare e bashkisë së Tiranës dhe do të kontribuojë në sektorin e financave dhe zhvillimit ekonomik. Gentian Keri, po ashtu i bashkohet kupolës drejtuese të bashkisë së Tiranës, më herët ai ka mbajtur postin e kryetarit të komisionit të prokurimeve publike. Po ashtu funksionin e nënkryetarit të bashkisë do ta mbajë edhe Blendi Sulaj, i cili më herët ka qënë pjesë e Partisë Republikane, por ju bashkua Partisë Socialiste para zgjedhjeve. Emërimi i tij si nënkryetar, shënon momentin e dytë, kur opozitarët që ndryshojnë angazhimin politik, emërohen në poste në bashkinë e Tiranës. Edhe Endrit Brahimllari, që më herët ka kontribuar në Lëvizjen Socialiste në Integrim, ndryshoi përkatësi politike dhe u emëruar nënkryetar i këshillit bashkiak. Nga ky ristrukturim nuk preket kryetarja e komanduar, Anuela Ristani, e cila do të vijojë të delegojë firmën e kryebashkiakut Erion Veliaj, në kushtet kur prej shkurtit të këtij viti, ai qëndron në masën e sigurisë ‘arrest me burg’. Në mbledhjet me dyer të mbyllura të Partisë Socialiste, Edi Rama nuk e ka përcaktuar asnjëherë nëse do ketë apo jo zgjedhje të parakohshme në bashkinë më të madhe në vend.