Më shumë se 12 civilë janë vrarë në Afganistan, ndërsa përleshje të reja kanë shpërthyer mes forcave të Afganistanit dhe Pakistanit të mërkurën, thanë talibanët, duke shkelur paqen e brishtë që ishte në fuqi për pak kohë pas përplasjeve gjatë fundjavës që lanë të vdekur dhjetëra persona. Dikur aleatë, tensionet e fundit mes dy shteteve të Azisë Jugore shpërthyen pasi Islamabadi kërkoi nga udhëheqja talibane në Afganistan që të ndërmarrë hapa kundër militantëve që kanë intensifikuar sulmet në Pakistan, duke argumentuar se ata operojnë nga Afganistani. Talibanët mohojnë se në Afganistan ka prani të militantëve pakistanezë. “Mëngjesin e sotëm, forcat pakistaneze kryen sulme... më shumë se 12 civilë u vranë dhe mbi 100 të tjerë u plagosën”, shkroi në X zëdhënësi i talibanëve, Zabihullah Muxhahid. Talibanët pretenduan po ashtu se kanë vrarë “një numër të madh ushtarësh pakistanezë”, kanë marrë kontrollin e postblloqeve të tyre, u kanë konfiskuar armët dhe tanket dhe kanë “shkatërruar” shumicën e ndërtesave të tyre ushtarake. Zyrtarët pakistanezë fajësuan talibanët për përleshjet dhe thanë se katër civilë janë plagosur në anën e tyre të kufirit. Luftimet kanë vazhduar për rreth pesë orë mëngjesin e së mërkurës dhe forcat pakistaneze e “zmbrapsën” sulmin, thanë zyrtarët. Edhe pse vazhdimisht ka përleshje mes forcave të sigurisë të të dyja shteteve përgjatë kufirit të tyre të kontestuar, 2.600 kilometra të gjatë, luftimet e javës së kaluar ishin më të ashprat që kur talibanët morën pushtetin në Kabul më 2021. Këto dy shtete fqinje kanë mbyllur disa pikëkalime kufitare pas përleshjeve të javës së kaluar, duke shkaktuar ndërprerje të tregtisë dhe duke lënë të bllokuar kamionë me mallra në dy anët e kufirit.