Kryetari i Bashkisë Maliq, Gëzim Topçiu, ka reaguar pas ngjarjes së rëndë që tronditi qytetin, ku një nënë dhe djali i saj 14-vjeçar humbën jetën, ndërsa vajza 6-vjeçare ndodhet në gjendje të rëndë në spital. Topçiu tha se bashkia do të jetë pranë familjes me të gjitha mundësitë, duke mbuluar shpenzimet e ceremonisë mortore dhe duke ofruar ndihmë financiare dhe sociale për të afërmit. Sinkron Kryetari i Bashkisë Maliq, Gëzim Topçiu:“Një situatë e vështirë jo vetëm për ne si institucion, por për të gjithë qytetarët e Maliqit, të cilët shprehin ngushëllimet për familjen. Shpresojmë që vajza të bëhet mirë, i urojmë shërim të shpejtë dhe patjetër që bashkia do të jetë në mbështetje të familjes me të gjitha mundësitë që ne kemi, për ta mbështetur financiarisht, por jo vetëm.Të gjitha shpenzimet që kanë të bëjnë me ceremoninë, por jo vetëm, do të mbulohen nga bashkia.”