Policia Rrugore e Tiranës bën me dije se vijojnë kontrollet intensive me dronë, radarë, kamera si dhe praninë e shtuar të shërbimeve të Policisë Rrugore, për evidentimin dhe ndëshkimin e shkeljeve që cenojnë sigurinë në rrugë. Sipas Policisë, gjatë javës së fundit, janë arrestuar ose proceduar30 drejtues automjeti për vepra penale në fushën e qarkullimit rrugor. Sakaq, 20 automjete janë tërhequr me mjet ngritës, pasi ishin parkuar në korsitë e autobusëve, taksive ose biçikletave, ndërsa janë pezulluar 22 leje drejtimi për shkelje të rënda të Kodit Rrugor. Policia Rrugore njofton se vijojnë kontrollet pa ndërprerje, në të gjitha akset dhe zonat urbane, me zero tolerancë ndaj çdo shkeljeje që cenon sigurinë rrugore dhe rrezikon jetën e përdoruesve të rrugës. Policia Rrugore e Tiranës apelon sërish për të gjithë drejtuesit e mjeteve, që të respektojnë me rigorozitet rregullat e qarkullimit rrugor, si një domosdoshmëri për garantimin e sigurisë në rrugë dhe për mbrojtjen e jetës.