Ministria e Jashtme e Izraelit tha se do të dëbojë aktivistët propalestinezë që gjenden në anijet e flotës Global Sumud, që u ndaluan nga forcat izraelite. “Pasagjerët e Sumudit të Hamasit janë nisur drejt Izraelit, ku do t’iu nënshtrohen procedurave të dëbimit për në Evropë. Pasagjerët janë të sigurt dhe në gjendje të mirë shëndetësore”, tha ministria në X, pasi forcat izraelite ndaluan disa anije me ndihma që ishin nisur drejt Gazës. Forcat izraelite kanë ndalur 14 anije me aktivistë të huaj dhe ndihma për Gazën, por 23 anije të tjera vazhdojnë lundrimin drejt enklavës palestineze. Në një video të publikuar më herët nga Ministria e Jashtme e Izraelit shihen shumica e aktivistëve më të njohur që po lundrojnë me këto anije, përfshirë aktivisten suedeze për klimën, Greta Thunberg, të ulur në anije dhe të rrethuar nga ushtarët.