Misioni i NATO-s në Kosovë, KFOR, ka hedhur poshtë raportimet e disa mediave lokale në Kosovë se misioni ka futur në listë të zezë disa zyrtarë të institucioneve të Kosovës dhe ua ka ndaluar hyrjen në Komunën e Leposaviçit. “KFOR-i nuk ndërhyn në lirinë e lëvizjes së individëve në Kosovë. KFOR-i mban kontakte të rregullta me të gjitha palët kryesore”. Misioni i NATO-s u ka bërë thirrje të gjitha palëve që të përmbahen nga deklaratat dhe veprimet e njëanshme qe mund të sjellin tensione dhe mund të ndikojnë në stabilitetin rajonal. Më herët, ambasadori amerikan Jeffrey Hovenier është shprehur se aktorë të huaj keqdashës synojnë ta minojnë demokracinë e Kosovës duke shfrytëzuar ndasitë etnike. KFOR-i ka mbi 4.400 trupa ushtarake në Kosovë. Dezinformatat sipas misionit mund të kenë ndikim të drejtpërdrejt në shoqëri, sidomos në kohë zgjedhjesh. Kosova do të mbajë zgjedhjet e ardhshme parlamentare më 9 shkurt të vitit 2025.