Një avion holandez F-35 u ngrit me shpejtësi nga pista të martën në bazën ajrore Volkel në Holandë, si pjesë e stërvitjes të përvitshme bërthamore të NATO-s, Steadfast Noon. Stërvitja e planifikuar prej kohësh, e cila nuk përfshin përdorimin e bombave të vërteta bërthamore, është praktikë rutinë për Organizatën e Traktatit të Atlantikut të Veriut, për të siguruar që është gati të përdorë armën e saj të fundit nëse është e nevojshme. Ndërsa tensionet janë rritur me Rusinë për shkak të luftës në Ukrainë dhe inkursioneve të përsëritura ajrore, stërvitja është gjithashtu një mesazh i qartë për Moskën për fuqinë potenciale të NATO-s. Për herë të parë, NATO këtë vit lejoi një grup të vogël gazetarësh, përfshirë AFP-në, që të ndjekin një pjesë të stërvitjes dyjavore. Duke përfshirë mbi 70 avionë nga 14 vende dhe rreth 2,000 trupa ushtarakje, stërvitja e këtij viti është përqendruar në rajonin e Detit të Veriut. Ftesa për shtypin ishte pjesë e distancimit të aleancës politike dhe ushtarake perëndimore nga një kulturë e thellë e sekretit ushtarak. NATO deri katër vjet më parë nuk zbulonte as emrin e stërvitjes bërthamore.