NATO-s do t'i duhen 35 deri në 50 brigada shtesë për të realizuar plotësisht planet e saj për t'u mbrojtur kundër një sulmi nga Rusia, tha një burim ushtarak për agjencinë e lajmeve Reuters. Burimi, duke folur në kushte anonimiteti, nuk pranoi të japë më shumë detaje rreth planeve, që janë sekrete. Një brigadë përbëhet nga 3,000 deri në 7,000 trupa, kështu që gjenerimi i 35 deri në 50 njësive të tjera, të tilla, do të ishte një sfidë e rëndësishme. Një tregues tjetër i përmasave të sfidës me të cilën përballet NATO, ndërsa rinovon qëndrimin për të marrë seriozisht kërcënimin e një sulmi rus, është edhe fakti se vetëm gjermanisë, sipas burimeve, do t’i duhet të katërfishojë kapacitetet e saj të mbrojtjes ajrore. Në një samit në Vilnius vitin e kaluar, liderët e NATO-s ranë dakord për planet e para të mëdha të mbrojtjes të aleancës në më shumë se tre dekada, dhe zyrtarët punuar në këtë drejtim, që atëherë. Udhëheqësit e NATO-s pritet të marrin një përditësim mbi planet në Uashington këtë javë, në një samit ku do të shënohet edhe 75 vjetori i aleancës transatlantike të sigurisë. Një zyrtar i NATO-s tha se planifikuesit ushtarakë të aleancës kishin identifikuar "kërkesa të detajuara për trupat dhe armët e nevojshme për të mbrojtur aleancën". “Mbrojtja ajrore dhe raketore, armët me rreze të gjatë veprimi, logjistika si dhe formacionet e mëdha të manovrimit tokësor janë ndër prioritetet tona kryesore”, shtoi zyrtari. Ministria e mbrojtjes në Berlin nuk pranoi të komentojë planet e ardhshme të NATO-s pasi ato janë të klasifikuara. Ajo tha se të gjithë aleatët janë ftuar të koordinohen për përmbushjen e nevojave të NATO-s dhe se këto përpjekje do të shtrihen edhe në vitin e ardhshëm.