Ministria rumune e mbrojtjes, ngriti në ajër dy avionë luftarakë gjatë natës, pasi Rusia kreu sulme të reja me dronë pranë kufirit të vendit me Ukrainën, thanë zyrtarët e vendit aleat të NATO-s, të mërkurën. Dy avionë luftarakë F-16 u ngritën nga një bazë e madhe ajrore në lindje të kryeqytetit rumun, në orën 23 e 15 minuta, pasi Moska "rifilloi sulmet e saj me dronë ndaj objektivave civile dhe infrastrukturës portuale në Ukrainë", tha Bukureshti në një deklaratë. Rusia ka sulmuar shpesh portin ukrainas të Izmailit, i cili ndodhet përballë qytetit rumun dhe rajonit më të gjerë të Tulceas. Lumi Danub shënon kufirin midis Rumanisë dhe Ukrainës. Oleh Kiper, guvernatori i rajonit jugor të Odesës, që përfshin edhe Izmailin, tha se zona përreth portit u godit nga sulme me dronë gjatë natës. Vendet e NATO-s u alarmuan edhe të dielën, me ushtrinë polake që ngriti po ashtu avionët ushtarakë në fluturim, pasi Moska kreu sulmin e saj më të madh ajror në ukrainë, në më shumë se tre vjet.