Besimtarët e fesë islame festojnë Kurban Bajramin, me lutje për paqe dhe solidaritet mes njëri-tjetrit. Ceremonia kryesore në Kosovë është mbajtur në Xhaminë e Madhe në Prishtinë, nën drejtimin e myftiut Naim Tërnava, i cili tha se festa e Kurban Bajramit është ditë gëzimi, por edhe reflektimi. “Është ditë kur kujtojmë mëshirën e Zotit, faljen dhe begatinë që ai na dhuron. Është ditë kur ne si besimtarë, por edhe si shoqëri, i kthejmë sytë edhe më shumë ndaj njëri-tjetrit me dhembshuri, solidaritet dhe përgjegjësi". Liderët e Kosovës i uruan besimtarët duke bërë thirrje për harmoni dhe begati në çdo familje. Presidentja e Kosovës, Vjosa Osmani, tha se Kurban Bajrami është thirrje për reflektim dhe forcim të lidhjeve. “Në këtë ditë të veçantë, uroj që në secilën shtëpi të mbizotërojë gëzimi, shëndeti dhe dashuria. Qoftë kjo festë një burim frymëzimi për një të ardhme më të ndritur, me më shumë dhembshuri, mirësi dhe respekt të ndërsjellë”. Kryeministri në detyrë i Kosovës, Albin Kurti, tha se “kjo festë i kujton të gjithëve sa e rëndësishme është të japim e të ndajmë me njëri-tjetrin, në harmoni e me dashuri”.