Elon Musk thotë se është "i zhgënjyer" nga projektligji i shpenzimeve i Presidentit amerikan Donald Trump, i cili sipas tij bie ndesh me punën e madhe të rishikimit të shpenzimeve të kryer nga departamenti i tij. "Isha i zhgënjyer kur pashë projektligjin masiv të shpenzimeve", thotë Musk në një intervistë për CBS, "sepse sinqerisht rrit deficitin buxhetor, në vend që ta ulë atë, dhe minon punën që po bën ekipi i efikasitetit qeveritar". Komentet e tij, ka të ngjarë të thellojnë përcarjen mes biznesmenit miliarder dhe trump, që në fillim të mandatit dukeshin të pandarë. Musk u vu në krye të "departamentit të efikasitetit qeveritar" (Doge) që nga janari, me mision uljen e shpenzimeve shtetërore. Ai më vonë njoftoi në prill se do të tërhiqej nga administrata Trump pasi të ardhurat e Teslës ranë ndjeshëm. Musk tani po godet projektligjin që trump e quajti Të madh e të bukur, i cili u miratua javën e kaluar nga Dhoma e Përfaqësuesve. Projektligji shtyn përpara një numër premtimesh të fushatës së Trump, duke përfshirë zgjatjen e uljes së taksave për individët dhe korporatat dhe përfundimin e stimujve për energji të pastër të miratuara nën Joe Biden. Megjithatë, projektligji financon gjithashtu ndërtimin e një muri përgjatë kufirit me Meksikën, si dhe stafin dhe mjediset për deportimet masive të emigrantëve pa dokumente. Edhe duke marrë parasysh shkurtimet, projektligji pritet t'i shtojë deficitit rreth 2.3 trilionë dollarë, sipas Zyrës së Buxhetit të Kongresit. "Mendoj se një projektligj mund të jetë i madh, ose mund të jetë i bukur. Por nuk e di nëse mund të jenë të dyja. Ky është mendimi im personal", tha Musk për CBS. Komentet do të nxisin zërat për një përçarje në thellim e sipër mes miliarderit dhe presidentit amerikan, të cilin Musk e mbështeti me financime vitin e kaluar. Në total, Musk i dhuroi fushatës së Trump 200 milionë dollarë dhe shumëkush beson se ndihma e ktheu Trumpin në Shtëpinë e Bardhë.