Moti i keq dhe reshjet e dëborës në disa qarqe të vendit kanë mobilizuar policinë e shtetit, e cila ka shtuar prezencën e efektivëve në terren dhe të Patrullave të Përgjithshme, me qëllim monitorimin e qarkullimit të automjeteve, parandalimin e aksidenteve dhe ndihmën për përdoruesit e rrugës në nevojë. Për shkak të motit të përkeqësuar, drejtuesit e automjeteve apelohen që të jetë vigjilentë gjatë drejtimit të automjeteve për të shmangu aksidente të mundshme. Bëhet me dije se aksi rrugor “Bypass-Qafë Murrizë” në Dibër është bllokuar nga Policia Rrugore e Dibrës dhe Tiranës për të shmangur pengesat dhe bllokimin e rrugës si pasojë e intensitetit të lartë të reshjeve të dëborës. Firma kontraktore po punon për pastrimin e rrugës nga dëbora. Aksi rrugor Fushë Arrëz - Iballë, në segmentin Qafë Shari - Laku i Ballçit, aktualisht është i pakalueshëm për shkak të reshjeve të dëborës dhe erës së fortë. Vështirësi në qarkullim për kamionët, për shkak të reshjeve të pandërprera të dëborës, ka edhe aksi rrugor Qafë Thanë – Librazhd. Ndërsa akset e tjera rrugore janë të hapura, ndërsa borëpastrueset ndodhen në terren dhe vijojnë punën për pastrimin e rrugëve dhe hedhjen e kripës.