Ish Ambasadori i OSBE në Shqipëri dhe ish Ambasadori i Holandës në Kosovë, Robert Bosch ka këshilluar klasën politike të Prishtinës që të mos ndjekë shembullin e keq të klasës politike të Tiranës. Në një intervistë për Ekonomia Online në Kosovë, diplomati holandez ka komentuar krizën disamujore në të cilën është përfshirë Kuvendi i Kosovës dhe retorikën e ashpërsuar mes partive politike. Duke kujtuar përvojën e tij në Tiranë, Bosch thotë se Kosova dikur merrej si shembull dhe fton politikanët e Prishtinës që të shmangin ashpërsimin e mëtejshëm të tensioneve mes tyre. “Në Kosovë shoh që ka shumë njerëz që nuk po punojnë bashkë dhe kjo është shumë e keqe. Unë kam qenë më herët në Shqipëri dhe atje ishte një nivel ekstrem tensioni. Politikanët e urrenin njëri-tjetrin, akuzonin njëri-tjetrin për gjërat nga më të këqijat e mundshme. Kosova merrej gjithmonë si shembull, sepse njerëzit ishin më të sjellshëm. Por duket se edhe kjo ka ndryshuar pak; edhe këtu politikanët kanë filluar të sillen keq, jo aq sa në Shqipëri, por po sillen. Nuk duhet të shkoni në atë drejtim, ku çdo gjë që bën opozita quhet krim”, theksoi Bosch. Bosch udhëhoqi përfaqësinë e OSBE në Shqipëri në vitet 2007-2010.