Dy vendet fqinje, aleate në NATO por kundërshtare në rajon, turqia dhe greqia, janë vënë sërish përballë njëra tjetrës me akuza, kundërakuza, pretendime e kërcënime. Kohët e fundit, greqia ka thënë se do të zgjerojë ujërat e saj territoriale në 12 milje detare rreth kretës, dhe kjo i ka hedhur benzinë zjarrit duke provokuar reagime të ashpra të Ankarasë. Së fundmi, Ibrahim Kalin, zëdhënës dhe këshilltar i presidentit turk, Recep Tayyip Erdogan ka paralajmëruar se do të ketë pasoja të rënda nëse greqia do tentojë të shtyhet në det. “Turqia nuk do të pranojë asnjë shtyrje, qoftë edhe me një milje të vetme. Nëse Greqia vendos të bëjë një lëvizje të tillë, Turqia do të reagojë ashpër ", tha Kalin. Komentet e tij janë në një linjë me deklaratat e mëparshme të ministrit të jashtëm dhe atij të mbrojtjes në Turqi. Megjithatë, Kalin nuk shkoi aq larg sa të shprehej nëse një zgjerim i ujërave territoriale greke do të konsiderohej si një akt që do të justifikonte reagimin ushtarak. Të dyja vendet janë përplasur me njëri tjetrin për një mori cështjesh, që nga mosmarrëveshjet për ujërat territoriale, të drejtat e kërkimit në det apo edhe statusin e disa ishujve në detin egje. Turqia akuzon Greqinë për shkelje të traktateve ndërkombëtare që rregullojnë kufijtë e dy vendeve duke militarizuar ishujt.