Policia e Kosovës ka bërë të ditur se më 12 shtator ka arrestuar një person i cili dyshohet se ka marrë pjesë në vrasjen e 71 civilëve shqiptarë në Vushtrri, gjatë luftës së vitit 1999. Sipas njoftimit zyrtar, i dyshuari ka qenë i mobilizuar si zyrtar me njësi të përbëra nga Ministria e Punëve të Brendshme të Serbisë. Sakaq sipas njoftimit të policisë, i pandehuri pas marrjes në pyetje, me vendim të prokurorit është dërguar në paraburgim. Prokuroria Speciale dhe Policia kanë konfirmuar se ai akuzohet për krime lufte kundër popullatës civile, pa dhënë detaje shtesë mbi rrethanat dhe lokacionet ku janë kryer këto krime. Që nga përfundimi i luftës në Kosovë, dhjetëra persona janë dënuar për krime lufte para gjykatave vendore dhe ndërkombëtare. Lufta e viteve 1998-1999 la pas mbi 13 mijë viktima, kryesisht civilë shqiptarë dhe mijëra të zhdukur.