Rezultatet paraprake të zgjedhjeve në Greqi i japin fitoren Demokracisë së Re dhe kryeministrit aktual grek, Kiriakos Mitsotakis, por jo shumicën e nevojshme për të formuar e vetme qeverinë e re. Sipas projeksioneve, Mitsotakis do të sigurojë nga 125 deri në 140 mandate në parlamentin me 300 vende. Për të formuar qeverinë e re i nevojiten të paktën 151 vende. Forcë e dytë projektohet Siriza e Aleksis Tsipras me 80 deri në 90 mandate, një rezultat zhgënjyes për të majtën greke. Ndërkohë, socialistët e PASOK-ut projektohen që të tejkalojnë për herë të parë pas një dekade 10 për qindëshin e votave, duke marrë nga 35 deri në 40 deputetë në parlamentin e ri. Rezultatet sugjerojnë se në parlamentin e ri do të hyjnë tetë parti politike greke, ndërsa fill pas zyrtarizimit të rezultatit, Kiriakos Mitsotakis do të nisë bisedimet e vështira për të siguruar shumicën qeverisëse. Nëse bisedimet për formimin e një koalicioni që të sigurojë 151 vota në parlament do të dështojnë, atëherë Greqi mund t’u drejtohet sërish zgjedhjeve në fund të muajit qershor, ose fillim të korrikut.