Një 35-vjeçar i identifikuar si Pavlin Cupi është arrestuar në Pogradec, pasi i janë gjetur 3 mina me telekomandë. Minat ishin të montuara me eksploziv plastic C4 dhe të lidhura me celular. 35-vjeçari Pavlin Cupi, banues në Rrilë të Lezhës dyshohet se prodhonte mina që më pas i shiste për veprimtari kriminale në Korçë. Arrestimi i 35-vjeçarit u bë në Pogradec, ndërsa ky I fundit ishte në makinë, ku policia gjeti dhe sekuestroi 3 mina me telekomandë, të montuara me lëndë të dyshuar eksploziv C4. Me arrestimin e Pavlin Cupit shkon në dy numri i të ndaluarve dhe në 6 i minave të sekuestruara, gjatë të dy fazave të operacionit “Remote”. Në shkurt të këtij viti, Ilir Burbuqi u arrestua në Korçë pasi iu gjetën 3 mina me telekomandë të cilat dyshohet se ishin gati për tu shitur dhe për tu përdorur më pas në ngjarje të mundshme kriminale. Ilir Burbuqi u arrestua asokohe në Qafë-Plloçë, teksa hetimet vijojnë për të zbuluar porositësit e mundshëm të minave.