Zoran Millanoviç ka fituar mandatin e dytë si president i Kroacisë të dielën, sipas rezultateve paraprake, pas numërimit të 98.65 për qind të votave. Millanoviç, nga partia opozitare Partia Social-Demokrate, është në rrugën e duhur për të fituar 74.58 për qind të votave, sipas numërimit të votave nga Komisioni Qendror Zgjedhor i Kroacisë. Kundërshtari i tij në balotazhin e së dielës, Dragan Primorac, nga partia në pushtet Unioni Demokratik i Kroacisë, HDZ, ka fituar ndërkohë 25.42 për qind të votave. Pjesëmarrja në zgjedhjet presidenciale në Kroaci, vend anëtar i NATO-s dhe Bashkimit Evropian, ishte 44.15 për qind, sipas të dhënave fillestare. “Kroaci, faleminderit”, tha Millanoviç pas daljes së rezultateve paraprake. “Kjo është një ditë e madhe për mua personalisht. Këtë fitore e shoh si njohje të punës time, një lloj besimi i popullit për mua”, tha ai. Roli i presidentit në Kroaci është në fakt kryesisht ceremonial. Kreu i shtetit nuk mund të vërë veto ndaj ligjeve, megjithëse ka peshë në politikat e jashtme dhe në çështjet e mbrojtjes dhe sigurisë. Gjatë mandatit të tij, Millanoviç, një ish-kryeministër populist, ka kundërshtuar kryeministrin Andrej Plenkoviç në lidhje me politikat e jashtme dhe publike. I parë shpesh si gjaknxehtë dhe arrogant, Zoran Millanoviç vitet e fundit, ka përdorur gjithnjë e më shumë retorikë populiste dhe shpesh fyese për të kritikuar Bashkimin Evropian dhe zyrtarët lokalë. I diplomuar në Drejtësi, ai ka qenë një nga figurat më dominuese në politikën e Kroacisë për gati dy dekada.