Një aksident I rëndë ka ndodhur pasditen e së shtunës në aksin rrugor Gramsh-Kushovë në afrësi të fshatit bregas. Një mikrobus që bënte transportin e pasagjerëve nga Gramshi drejt fshatrave të zonës, ka dalë nga rruga dhe ka përfunduar në humnerë, duke u rrokullisur në një lartësi 30 m. Si pasojë e aksidnetit të rëndë mësohet se ka humbur jetën një pasagjer rreth 30 vjeç, Ledian Lami, banues në fshatin Terrovë të Skraparit. Ndërkohë lëndime të shumta kanë marrë edhe 9 pasagjerë të tjerë që udhëtonin në mikrobusin e aksidentuar. Pasagjerët e aksidentuar mësohet se janë nxjerrë nga furgoni nga punonjësit e shërbimit zjarrfikës dhe nga efektivë të policisë rrugore. Mes tyre një e moshuar është në gjendje më të rënduar dhe u dërgua me avion ushtarak në spitalin e traumës në Tiranë. Të plagosurit e tjerë janë dërguar gjithashtu në Tiranë me tre autoambulanca. Nuk dihen ende shkaqet e aksidentit, por dyshohet se drejtuesi i mjetit ka humbur kontrollin. Ai është marrë në pyetje nga policia. Grupi hetimor ka kryer veprimet në vendin e ngjarjes dhe po punon për zbardhjen e rrethanave të aksidentit.