Një ditë pas takimit të zhvilluar me kryetaren e misionit të vëzhguesve të OSBE/ODIHR, Audrey Glover, në selitë respektive, kryetari i Partisë së Lirisë, njëherësh ish-Presidenti Ilir Meta, është takuar këtë të martë në selinë e Partisë Demokratike me ish-kryeministrin Sali Berisha. Ky takim ka zgjatur për rreth 30 minuta, ku është biseduar rreth fushatës elektorale dhe zgjedhjeve vendore të 14 majit. Në përfundim të tij, Meta nuk pranoi të japë detaje nga takimi. Po ashtu ky takim vjen në një kohë kur kryetari i autorizuar i Partisë Demokratike zyrtare, Enkelejd Alibeaj, nëpërmjet përfaqësuesit ligjor në KQZ, ankimoi vendimin e Celibashit për fletën e votimit, ku nuk vendosej tek koalicioni emri i partisë udhëheqëse. Sipas Alibeajt, kjo është bërë për të favorizuar koalicionin, pasi sipas tij emri i Ilir Metës si drejtues koalicioni, do të bënte që shumë demokratë të mos e votonin.