Policia e Vlorës ka kapur dhe ndaluar dy persona të shpallur në kërkim për kultivimin e bimëve narkotike, në kuadër të një grupi të strukturuar kriminal. Personat e arrestuar janë Aldo Tushaj, 38 vjeç dhe Sefer Dukaj, 45 vjeç. Ata ishin shpallur në kërkim pas vendimit GJKKO, e cila më 1 tetor 2024, i dënoi Aldo Tushajn me 3 vite e 11 muaj e 18 ditë burgim dhe Sefer Dukajn me 2 vite e 7 muaj e 18 ditë burgim, për veprën penale “Kultivim i bimëve narkotike”. Ky vendim u konfirmua edhe nga Apeli i GJKKO më 20 tetor të këtij viti. Operacioni për arrestimin e tyre u realizua nga Strukturat e Seksionit për Hetimin e Narkotikëve dhe Seksionit Operacional të Hetimit në Drejtorinë Vendore të Policisë Vlorë. Pas kapjes, materialet procedurale u referuan Prokurorisë për veprime të mëtejshme, duke theksuar angazhimin e policisë në luftën kundër krimit të organizuar dhe trafikut të lëndëve narkotike.