Ish-Presidenti rus Dmitry Medvedev tall Presidentin e SHBA-së Donald Trump, duke thënë se Shtetet e Bashkuara nuk kishin dërguar nëndetëse bërthamore në brigjet ruse, siç kishte premtuar Trump. Trump të martën e quajti Medvedevin "një budalla" dhe tha se ai kishte zhvendosur një "ose dy nëndetëse" në brigjet e Rusisë. Ai më herët, në gusht, kishte deklaruar se kishte urdhëruar që dy nëndetëse bërthamore të zhvendoseshin në "rajonet e duhura" në përgjigje të kërcënimeve nga Medvedev. "Episod i ri i serialit thriller", shkroi Medvedev në platformën X. "Trump përmendi edhe një herë nëndetëset që dyshohet se i ka 'dërguar pranë brigjeve ruse' duke këmbëngulur se ato janë 'të fshehura shumë mirë'. "Siç thotë shprehja, është e vështirë të gjesh një mace të zezë në një dhomë të errët, veçanërisht nëse ajo nuk është atje," tha Medvedev. Në gusht, presidenti amerikan Donald Trump, i ofenduar nga postimet e ish presidentit rus, Dmitry Medvedev, tha se kishte urdhëruar dy nëndetëse bërthamore të niseshin drejt rusisë. Në një postim në Truth Social, Trump kishte shkruar se kishte vendosur të ripoziciononte nëndetëset bërthamore për shkak të "deklaratave shumë provokuese" të Medvedevit, duke vënë në dukje se ai tani ishte zëvendëskryetar i këshillit të sigurisë së Rusisë. Medvedev më parë kishte thënë se kërcënimet e Trump për të sanksionuar Rusinë ishin "një hap drejt luftës". "Kam urdhëruar që dy nëndetëse bërthamore të pozicionohen në rajonet e duhura, në rast se këto deklarata nxitëse janë më shumë se kaq", u përgjigj Trump. "Fjalët janë shumë të rëndësishme dhe shpesh mund të çojnë në pasoja të padëshiruara, shpresoj se ky nuk do të jetë një nga këto raste", tha ai. Trump sidoqoftë nuk specifikoi në atë kohë nëse po i referohej nëndetëseve me energji bërthamore apo nëndetëseve të armatosura me armë bërthamore.