Është zbardhur dëshmia e autorit të dyshuar të krimit që tronditi opinionin publik, Elvis Shkambi, i cili vrau me armë zjarri gjyqtarin e Apelit në Tiranë, Astrit Kalaja. Ngjarja ndodhi në sallën e gjyqit, menjëherë pasi gjyqtari lexoi vendimin që nuk ishte në favor të familjes së autorit. Sipas hetimeve, Shkambi nxori pistoletën nga brezi dhe qëlloi në drejtim të gjyqtarit, duke e lënë të vdekur në vend. Po ashtu, ai plagosi edhe babë e bir, Rakip dhe Ervis Kurtaj, me të cilët kishte një konflikt pronësie. Pas arrestimit, 30-vjeçari Elvis Shkambi është shprehur se u shty nga vendimi kundër familjes së tij, për të kryer aktin e rëndë. “Më kishte ardhur në majë të hundës me gjyqet. Dëgjova që mori vendimin në favor të palës tjetër. Unë nuk e kam menduar përpara vrasjen, por aty m’u mbush mendja për ta vrarë, kur dha vendim kundër nesh”, ka rrëfyer ai. Sipas raportimeve pas krimit, autori ka dalë nga ambientet e gjykatës gjakftohtë, ndërsa iu është dorëzuar forcave të policisë, duke pranuar vrasjen. Këtë të mërkurë, në Pallatin e Kongreseve janë mbajtur homazhet në nderim të gjyqtarit Astrit Kalaja, ku familjarë, miq dhe kolegë i kanë dhënë lamtumirën e fundit.