Hekuran Gjeli është një prej 45 personave të ndaluar në Elbasan si pjesëtar të grupit të shkatërruar kriminal për prodhim dhe trafik droge. Ai është një emër jo pak i njohur për blutë e qytetit të Elbasanit, pasi rezulton të jetë pjesë e grupit të Çapjave, ndërsa më herët është arrestuar për armëmbajtje pa leje. Burime nga policia bëjnë me dije se personat e arrestuar kanë pasur kryesisht rol dominues në zonat ku kanë kryer shpërndarjen e lëndës narkotike, të cilat ishin të ndara. Ndërkohë ndër të tjera mësohet se 5 nga 7 të shpallurit në kërkim figurojnë aktualisht jashtë vendit dhe po punohet me autoritetet e huaja për gjetjen dhe arrestimin e tyre. Më tej, burime nga Policia bëjnë me dije se vendet nga ku sigurohej lënda narkotike ishin Fieri, Pogradeci dhe Tirana. Për shkak të numrit të madh të të ndaluarve, Policia ka zgjedhur të përdorë autobuz për transferimin e tyre drejt Tiranës.