Një 30 vjecar është vënë në pranga nga policia e Durrësit, pasi akuzohet për shitje të lëndëve narkotike dhe për armëmbajtje pa leje. Policia bëri të mundur finalizmin me sukses të operacionit policor të koduar "Rebeli", në kuadër të së cilit u vu në pranga shtetasi Ermir Murataj, banues në Durrës. Uniformat blu bënë me dije se në cilësinë e provës materiale u sekuestruan 1 armë zjarri tip pistoletë, 1,2 kilogramë lëndë narkotike e dyshuar cannabis sativa, fara canabisi, një peshore elektronike që shërbente për ndarjen e lëndës narkotike në doza dhe dy aparate celularë. Sipas informacioneve paraprake, mësohet se 30-vjeçari, ishte me precedent të mëparshëm penal në fushën e narkotikëve. Materialet i kaluan Prokurorisë së Rrethit Gjyqësor Durrës, për veprime të mëtejshme, për veprat penale "Prodhimi dhe mbajtja pa leje e armëve luftarake dhe e municionit" dhe "Prodhimi dhe shitja e narkotikëve".