Më tetë maj do të testohet për herë të parë ulja në pistën e aeroportit të Vlorës, i cili pritet të fillojë të operojë brenda këtij sezoni veror. Detajet i dha ministrja e infrastrukturës, Belinda Balluku. Balluku: “Më datë 8 maj, vetëm pas pak ditësh, do kemi testin e parë te uljes në pistën prej 3.2 kilometrash këtu në Vlorë duke i lënë pastaj gjithë kohën disa mujore, por brenda sezonit veror për të nisur operimet zyrtare nga Aeroporti i Vlorës, aeroporti i gjithë shqiptarëve. IATA (Shoqata Ndërkombëtare e Transportuesit Ajror) ka vlerësuar aplikimin e Aeroportit Ndërkombëtar të Vlorës në përputhje me standardet ndërkombëtare dhe i ka vendosur kodin për aeroportet dhe shitjen e biletave: VLO” Në Vlorë, u firmos edhe marrëveshja mes kompanisë ushtarake shtetërore të Shqipërisë, KAYO, dhe kompanisë izraelite Elbit Systems për themelimin e Akademisë së Aviacionit. Kryeministri Edi Rama vlerësoi se Shqipëria ndodhet në një moment kthese historike sa i takon investimeve në fushën e mbrojtjes.