Policia e shtetit ka vijuar kontrollet në të gjithë vendin me qëllim kapjen e personave të kërkuar dhe të atyre që qarkullojnë me armë zjarri me vete. Efektivët kanë bërë me dije se janë vënë në pranga 3 persona, 2 prej tyre u kapën me lëndë narkotike dhe tjetri me armë zjarri pa leje me vete. Gjithashtu u sekuestruan 31 200 euro të cilat një shtetas i transportonte nga Tirana për në Shkodër. Këtë shumë eurosh, drejtuesi i mjetit deklaroi se e kishte sjellë nga Tirana, për llogari të një shtetasi në Shkodër. Sipas njoftimit zyrtar të policisë, bëhet me dije se u kontrolluan 1872 automjete dhe 134 ambiente të ndryshme, pasi Policia dispononte informacione operative me risk. Uniformat blu shoqëruan për verifikim në komisariat, 112 shtetas, ndër ta 32 me precedent të mëparshëm penal. Njëkohësisht, në të gjithë vendin u bllokuan edhe 33 automjete pa dokumentacion dhe disa të shpallura alert. Kontrollet e befasishme me intervale të shkurtra kohore dhe në lëvizje do vijojnë në të gjithë vendin, edhe në ditët në vijim.