Katër emigrantë janë mbytur në ishullin grek, Lesbos, në përpjekje për të kaluar detin nga Turqia, njoftoi të hënën Roja Bregdetare e Greqisë. Ajo shtoi se 18 emigrantë të tjerë u shpëtuan. Zyrtarët nuk dhanë më shumë hollësi për këtë rast. Më 19 gusht, autoritetet greke shpëtuan rreth 60 emigrantë të cilët po përpiqeshin të kalonin nga Turqia në ishujt lindor të Detit Egje me mjete lundrimi gomone. Numri i emigrantëve që kanë mbërritur në Greqi me anije të tilla të ofruara nga trafikantët, është rritur dukshëm në javët e fundit. Më shumë se 15.600 njerëz kanë mbërritur në Greqi këtë vit, sipas të dhënave të agjencisë së Kombeve të Bashkuara për refugjatë, UNFCR, gati 12.000 prej tyre përmes detit. Në qershor, qindra njerëz u mbytën në ujërat ndërkombëtare pasi barka e peshkimit, me të cilën po udhëtonin, u përmbys rrugës për në Itali. Zyrtarët grekë kanë fajësuar konfliktet në Afrikë për rritjen e numrit të emigrantëve, cka ka shtuar trysninë mbi rrugët kryesore të trafikimit në Evropë, si edhe po bën që të lulëzojë një industri e errët në Turqi, që prodhon gomone me cilësi të ulët. Kushtet e mira të detit gjatë verës kanë ndihmuar po ashtu në rritjen e numrit të emigrantëve që ndërmarrin udhëtimet e rrezikshme. Qeveria e Greqisë thotë se nuk e ka ndryshuar politikën e vet për interceptimin e anijeve në det, cka edhe e kishte ulur dukshëm numrin e emigrantëve në vitet e fundit. Grupet për të drejtat e njeriut e akuzojnë Greqinë se bën dëbime të jashtëligjshme të njerëzve që arrijnë në brigjet greke. Athina e mohon këtë akuzë.